… Шарл де Гол не го одбележал своето време единствено со силното воено или политичко влијание, туку можеби овие негови примарни професионални реализации побргу ќе се повиеле со обвивката на заборавот доколку нив лично не ги засведочил со напишаните „Воени мемоари“ и „Спомени“. Токму оваа напишана белетризирана мемоарска проза претставува дополнителна претстава за неговиот ингениозен талент и како писател – креативен хроничар на времето од Втората светска војна, во кое и самиот бил активен и влијателен актер на воените и на политичките настани. Како што ќе се наголемува дистанцата на времето во кое доминирал неговиот воен, политички и државнички авторитет, сè повеќе ќе доаѓа до израз и неговата значајна улога како писател- мемоарист. Книжевно-творечкото произнесување на неговите „Воени мемоари“ вредносно го доближуваат до поголемите писателски авторитети, коишто ги напишале трајно читаните и критички вреднуваните историски или военотематски романи.