Препев од бугарски: Валентин Таневски

Поезија изградена од природни материјали. Гаење на смисла без вештачко оптоварување. Зачувување на чувството без конзерванси. Етеричен веј од зборови отаде минатото и сегашноста. Вселена за навраќање.

Петар Чухов

Новата стихозбирка на Светла Радкова е оригинално продолжение на нејзиното поетско присуство, одбележано со специфичен сопствен ракопис и зголемена чувствителност кон она што се случува овде и сега, но предопределено или повторливо во безграничната неизмерност на времето. Затоа  таа го насловила секој свој лирски текст со латинскиот и бугарскиот еквивалент, за да ги сопостави како различните епохи така и сегашниот миг со вечноста. Небаре се археолошки фрагменти од латински натписи сместени во секојдневниот порој на брзопроточната стварност, во која авторката ги бара спасоносните референтни точки од изворот на библиската мудрост до надминувањето на актуелните проблеми на современикот.

Димитар Христов