„Женидбата на Фигаро“, всушност, е комедијата што на Бомарше му го донела најголемиот успех како писател на комедиии драмски автор. Неговите комедии биле цензурирани пред да бидат изведени, така што нивната сценска постановка се случувала многу подоцна. Сепак, цензурата не можела да спречи нешто што било љубопитно очекувано, а подоцна и општо прифатено од публиката, особено поради силната критичка острица кон општеството и владејачкиот естаблишмент на тоа време, по која Бомарше бил препознатлив. …Во „Женидбата на Фигаро“ доаѓа до полн израз комедиографскиот сензибилитет на Бомарше, неговата сатирична зајадливост, иронично-циничната неумоливост при сликањето и исмејувањето на хипокризијата, неморалот и бескрупулозноста на аристократијата. Критичарите од неговото време како и оние подоцнежните сеедно гласни: Бомаршевата впечатлива и препознатлива комедија има двојно значење – „како општествено-политичка сатира и како психолошка и општо човечка комедија“.