… Штефан Цвајг спаѓа во редот на мошне сложени, богати и разновидни творечки личности; познат е како поет, раскажувач, драмски писател, романсиер, биограф, патописец… За разлика од другите книги на Штефан Цвајг, кои се пишувани со голема, речиси опсесивна посветеност на формата, изразот и стилот, „Вчерашниот свет“ е дело кое во тој поглед не е на тоа рамниште, се разбира, поради објективната околност што авторот не бил во состојба да го доработи и на свој, единствен начин на посветеник и вљубеник во формата и естетиката, да го заокружи и самиот да го подготви за печат. Во оваа книга на Цвајг, на еден возбуден, возбудлив, повишен и возвишен начин речиси се опеани младоста, пријателството, уметноста и, над сè, слободата, мирот, заедништвото, толеранцијата, разбирањето меѓу луѓето и народите. Овие опсесивни пораки во целост го армираат ова блескаво дело на Цвајг, тие се светилки чиј сјај има непотрошлива енергија што осветлува и стоплува сè до денес, поттикнувајќи и охрабрувајќи многу генерации читатели.