… Славниот холандски уметник освен со својот ненадминат ликовен опус, меѓу другото, во светот е познат и благодарејќи на неговата епистоларна активност на која се припишуваат и книжевно-естетски вредности. Имено, континуираната и долгогодишна писмена кореспонденција, главно со неговиот помлад брат Тео, овозможила многу важни и клучни детали од неговиот живот, изворно и во оригинална форма, да бидат сочувани не само како драгоцен материјал за неговите биографи и проследувачи на неговото дело, туку и како потврда за писателските вредности на еден врвен уметник. Збирката писма на Винсент ван Гог (од вкупно над илјада, сочувани биле околу шестотини писма) претставува вистински трезор од непроценлива важност во расветлувањето на ликот и делото на еден од најголемите сликари во историјата со огромни заслуги на почетоците од современата уметност.