Во оваа пригода ви претставуваме панорама на српски поетеси од различни возрасти, од различни средини, различни книжевни правци, тематски преокупации и поетски изрази. Она што на повеќето им е заедничко е литературното образование како и љубовта и безрезервната припадност кон поезијата. Некои имаат богат поетски опус, но има и такви кои се на почетокот на своето поетско патување. Некои од нив се непознати за македонската литературна јавност, а се веќе познати со нивни преведени песни, некои со поетски циклуси но и со поетски избори и цели книги. Ќе имате можност да читате поезија на поетеси кои доаѓаат или живеат во различни области каде што се зборува српскиот јазик (Србија, Република Српска, Црна Гора, Романија, Македонија); потоа, поезијата на поетесите за кои нема територијални граници, ниту јазични бариери, кои предаваат на европските универзитети и членуваат во уреднички одбори на странски списанија. Ќе читате песни од поетеси од т.н. урбани средини, но и поезија на поетеси кои ја негуваат традицијата, историското и културното наследство, кои се борат за зачувување на српското село. Ќе ја почувствувате моќта на нивните зборови, ќе бидете зачудени од нивната убавина, ќе станете свесни за нивната севременост; ќе ги разберете сите состојби на нивните битија: болката, безнадежноста, осаменоста, возбудата, смиреноста, очајот, повреденоста, нежноста, помирувањето, трагедијата, возвишеноста, гневот.

Бранко Цветкоски и Жељка Авриќ