Епистоларната проза „Проникнување“ на Епископот Давид (Нинов) и проф. Синоличка Трпкова нема датуми, што бездруго упатува на фактот дека дијалогот е сместен во едно, да се изразам – безвремено време. Очигледно е дека авторите на книгата не само што ги проникнуваат уметноста и теологијата, туку генерално водат една философско-уметничко-теолошка расправа, која исцрпно обработува одредени теми поврзани со човековото животно искуство, со филмот, со поезијата. Наместа, авторите испишуваат и лични случки, средби и патувања, одредени анегдоти од животот, кои на книгата ѝ даваат посебен шарм и како една целина ја прават особено интересна за читање, и битна за збогатување на сопствениот емпириски опит. Книгата „Проникнување“ е вистинско освежување на македонската проза и упатува на фактот дека насекаде во уметноста на живеењето треба да ја бараме и да ја наоѓаме убавината, бидејќи според зборовите на Достоевски: „Убавината ќе го спаси светот“!

Јанинка Невчева