Роман за жестоките трауми, страдањата и за големата и исцелителна љубов во времето на цврстиот тоталитаристички период и во годините на „перестројката“ во големата Русија, главно прикажан преку животот на семејството Норштејн-Храповицки. Роман едноставен и сложен во исто време, како животот на милионите Руси во засегнатиот период. Лакмусот на сите трогателни и величествени собитија кои концентрично се пластат од страница во страница е чудесниот пијанист, концертмајсторот Арсениј.
Наративната магија која полека се расплетува низ седум поглавја е семејна сага за децениите на советската ера, чии подводни струи некои ги однесуваат до врвот на моќта, а други ги туркаат во витлите на неповратот.
Од насловот на романот „Концертмајсторот“ станува сосема јасно дека атмосферата во која живеат и дејствуваат ликовите е музичка. На неговите страници, заедно со ликовите создадени од имагинацијата на писателот, се појавуваат како одлична документарно-историска поткрепа и еминентните советски и светски музички дејци Хреников, Шостакович, Рихтер, Нојхаус и други.